A Dirección Xeral de Emerxencias e Interior da Xunta de Galicia decretou para a xornada de hoxe, mércores 11 de febreiro de 2026, unha alerta laranxa por fenómenos meteorolóxicos adversos, concretamente por fortes refachos de vento.
Ante esta situación, a Xunta comunicou a suspensión de todas as actividades que se realicen no exterior dende as 12:00 horas de hoxe ata as 00:00 horas do xoves 12 de febreiro. Esta medida afecta tamén á Secretaría Xeral para o Deporte, que decretou a suspensión de calquera actividade deportiva federada que teña lugar ao aire libre durante o período mencionado.
En cumprimento destas directrices de seguridade, o Concello de Arteixo informa á cidadanía de que procederá ao peche das instalacións dos Campos de Fútbol Municipais a partir das 12:00 horas de hoxe mércores.
Dende o goberno local pregamos aos veciños e veciñas que extremen as precaucións, eviten os desprazamentos innecesarios en zonas arboradas ou con elementos que poidan desprenderse e desculpen as molestias que este peche preventivo poida ocasionar. A seguridade da nosa veciñanza é a prioridade absoluta neste episodio de temporal.