O Auditorio do Centro Cívico Cultural Manuel Murguía converterase este sábado, 11 de abril, no escenario dunha estrea cinematográfica con marcado selo local. A partir das 19:00 horas, presentarase o documental ‘Reflexos do amor escuro’, un proxecto audiovisual dirixido por Fran Naveira, Gutier Rolán e J.A. Jiménez que afonda na memoria histórica e na sensibilidade artística.
A obra sitúa ao espectador no ano 1977, tomando como punto de partida unha curtametraxe de ficción rodada orixinalmente en super 8 mm. O fío condutor da peza entrelaza as vivencias de homes naquela época coa carga simbólica dos «Amores escuros» de Federico García Lorca, incluíndo a teatralización dos seus sonetos.
A dirección do documental conta cunha forte vinculación co municipio, destacando o labor do cineasta arteixán Fran Naveira e do veciño do concello Gutier Rolán. No elenco participan Edgar Blanco e Sete Eiroa, quen dan vida a esta narración de 52 minutos de duración.
O proxecto, que aborda temáticas como a represión e a resistencia desde unha perspectiva valente e necesaria, está recomendado para un público maior de 16 anos. O acceso á proxección realizarase mediante invitación ata completar o aforo do recinto municipal. Con esta iniciativa, o Concello de Arteixo reafirma o seu compromiso co impulso e a visibilización dos creadores locais no ámbito da cultura e o cinema.