O Concello inicia a licitación das obras de mellora da seguridade viaria e acondicionamento da estrada provincial DP-0511 ao seu paso polo núcleo de Ervedíns, na parroquia de Loureda. O proxecto conta cun orzamento de licitación de 627.000 euros e permitirá construír unha senda peonil e urbanizar este tramo para mellorar a seguridade, a accesibilidade e a calidade urbana da contorna.
A intervención responde aos obxectivos do Plan de Accesibilidade municipal e ao compromiso do Concello de promover unha mobilidade sostible e accesible para toda a cidadanía. A actuación busca transformar o espazo público mediante a creación de itinerarios seguros e accesibles, dando prioridade aos peóns e mellorando as condicións de circulación para os distintos usuarios da vía.
O tramo presenta actualmente varias deficiencias que dificultan os desprazamentos a pé, entre elas a ausencia de beirarrúas e mesmo de cunetas, a visibilidade limitada e a elevada velocidade de circulación dos vehículos. Estas circunstancias impiden realizar percorridos peonís en condicións adecuadas de seguridade e accesibilidade.
A situación require unha atención especial pola presenza de dúas paradas de transporte público que tamén dan servizo ao transporte escolar. Esta circunstancia fai que unha parte importante dos desprazamentos peonís corresponda a familias con nenos e nenas.
O proxecto contempla a construción dunha senda peonil que garanta a continuidade dos itinerarios a pé e facilite a conexión entre as distintas marxes da estrada mediante novos pasos de peóns. Tamén se reformará a sinalización vertical e horizontal para mellorar a seguridade viaria.
A actuación inclúe a instalación dunha nova rede de iluminación pública con tecnoloxía LED e iluminación específica nos pasos de peóns. Ademais, renovarase a rede de saneamento e adaptaranse as infraestruturas de evacuación das augas pluviais á nova configuración da vía.
As obras permitirán tamén soterrar as liñas aéreas eléctricas e de telecomunicacións e incorporar novo mobiliario urbano. Con estas intervencións preténdese mellorar tanto a funcionalidade como a integración estética do espazo.
O Concello busca así avanzar na humanización das vías e na mellora da accesibilidade universal, creando un contorno máis seguro e cómodo para os veciños e veciñas de Ervedíns e favorecendo unha convivencia máis equilibrada entre os peóns e o tráfico rodado.
