O Pazo dos Deportes acollerá o próximo domingo 21 de decembro unha nova edición do tradicional Xantar de Nadal 2025 – Encontro de Maiores, un evento destinado a fomentar a convivencia e recoñecer o papel das persoas maiores do municipio.
O encontro está dirixido a persoas empadroadas en Arteixo, pensionistas, maiores de idade, xubiladas, prexubiladas e cónxuxes destes grupos.
O prezo da entrada é de 6 euros, e a repartición de números realizarase do luns 1 ao venres 5 de decembro, en horario de 09:00 a 13:30 horas, no Centro de Maiores A Baiuca (Trav. de Arteixo, 247 baixo). Poderase recoller un máximo de 10 entradas por persoa, ata esgotarse.
Para a retirada das entradas será necesario presentar o DNI, o xustificante da condición de pensionista ou prexubilado, e o libro de familia no caso de matrimonios celebrados durante o ano 1975.
As persoas interesadas poden obter máis información chamando ao teléfono 981 659 095.