O Concello comeza as obras de construción da nova senda peonil e ciclista da Avenida da Praia, no polígono de Sabón, unha actuación que contará cun investimento de 1,1 millóns de euros e un prazo de execución de seis meses.
O proxecto contempla a creación dun itinerario de dous quilómetros formado por unha senda peonil diferenciada e un carril bici paralelo, co obxectivo de mellorar a mobilidade e incrementar a seguridade nunha das vías con maior intensidade de tráfico do municipio, utilizada diariamente por traballadores, vehículos industriais e persoas que se desprazan cara á zona litoral.
As obras serán executadas pola empresa Vázquez y Reino, S.L., adxudicataria do contrato tras presentar a mellor oferta nun procedemento ao que concorreron cinco empresas.
A actuación inclúe tamén a reorganización do estacionamento mediante a habilitación de 207 prazas, sete delas reservadas para persoas con mobilidade reducida, contribuíndo a mellorar a accesibilidade e a funcionalidade desta avenida.
Esta intervención enmárcase na estratexia municipal de impulso á mobilidade sostible, favorecendo os desprazamentos a pé e en bicicleta e reforzando a conexión da rede ciclista local cun dos principais polos de actividade económica de Galicia.
