Filtro xeral
Filtro xeral

Inicio > Revive a música do Xabarín Club no concerto «Lembra Xabarín» en Arteixo

/ Revive a música do Xabarín Club no concerto «Lembra Xabarín» en Arteixo

O Auditorio do Centro Cívico Cultural Manuel Murguía  acollerá o venres 20 de novembro, ás 19:00 horas, o concerto «Lembra Xabarín», unha proposta do grupo Priscila que rende tributo á música do Xabarín Club. A actuación está dirixida a todos os públicos, terá unha duración aproximada de 70 minutos e contará con entradas a 4 e 3 euros.

O espectáculo propón unha viaxe musical e lingüística aos anos oitenta e noventa a través das cancións que acompañaban os capítulos dos debuxos animados do Xabarín Club. Unha época na que, como lembra a proposta, falar galego tamén era rock and roll, punk e unha forma de desafiar o sistema.

O repertorio recupera temas e referencias de grupos e artistas como Heredeiros da Crus, Aerolíneas Federales, Os Diplomáticos de Monte-Alto, Víctor Coyote, Blood Filloas, La Marabunta e Siniestro Total.

A banda está formada por Fer González, á voz; Yenina Alonso, nas voces; Aitor Salgado, á batería; Dani García e Fran J. Gómez, ás guitarras; e Borja Iglesias, ao baixo.

«Lembra Xabarín» convida o público a recuperar aquelas cancións e compartir en familia unha viaxe musical a unha época que deixou pegada na cultura popular galega.