O Centro Municipal Arteixo Innovación acolleu hoxe a xornada de peche do Proxecto Londra, unha iniciativa estratéxica que supuxo a transformación e mellora dos cauces do río Bolaños e o regato da Bidueira. O acto contou coa participación dos redactores técnicos Alejandro Peña e José María Ruiz; a coordinadora municipal, Carlota Pita; o concelleiro de Obras, José Manuel Caamaño, e o coordinador de planificación, Víctor Ramos.
Esta xornada serviu para facer balance das obras executadas durante o ano 2025, financiadas con fondos europeos. Entre as actuacións destaca a construción dunha nova ponte sobre o río Bolaños, deseñada para aumentar a capacidade do caudal e eliminar obstáculos. Grazas ao incremento do ancho e o fondo de ambos cauces, Arteixo gaña seguridade fronte a posibles inundacións en tempadas de choivas intensas. Ademais da mellora hídrica, a obra civil permitiu ensanchar o paso para vehículos e peóns, facilitando a mobilidade na zona.
O Proxecto Londra contou cun investimento total de 950.000 euros, co financiamento do 80 % a través da Fundación Biodiversidad e o Ministerio de Transición Ecológica. O plan completouse cunha importante vertente ambiental mediante a plantación de vexetación autóctona nas ribeiras, co obxectivo de recuperar a dinámica natural dos ecosistemas. Con estas solucións baseadas na natureza, o paseo fluvial consolídase como un eixo verde estruturante e un corredor ecolóxico fundamental para o núcleo urbano de Arteixo.
