O Auditorio do Centro Cívico Cultural de Arteixo Manuel Murguía convértese este fin de semana no epicentro do teatro afeccionado coa clausura do II Certame de Teatro Amador Premios amArte 2026. A programación municipal inclúe para estes días a posta en escena da quinta obra finalista do concurso e a celebración da gran gala final na que se darán a coñecer os galardóns decididos polo xurado e polo público.
A actividade comezará o venres 5 de xuño ás 20:30 horas coa representación de «El Legado», a cargo da formación segoviana Cía. El Telón Negro. Esta peza, dirixida a un público maior de 16 anos e cunha duración de 80 minutos, chega avalada por importantes recoñecementos no Certame de Foz, onde obtivo os premios de mellor obra, mellor dirección e mellor actriz. A sinopse narra a historia de Carmen, unha emigrante española, e a súa viaxe cara ao pasado arredor da desaparición da súa filla e da súa neta durante a ditadura arxentina, homenaxeando a loita das Avoas e Nais de Praza de Maio.
O sábado 6 de xuño, tamén ás 20:30 horas, terá lugar a Gala de Entrega de Premios amArte 2026. O evento contará coa participación especial, fóra de concurso, da Asociación Cultural Faíscas de Arteixo, que presentará a comedia «Unha rosca, un fiambre e un cancan». Trátase dunha peza de misterio e humor apta para todos os públicos e interpretada integramente por mulleres, cuxa trama xira en torno a un asasinato sen resolver nun pazo histórico coa intervención da garda civil da zona.
Ao termo desta actuación procederase á lectura do fallo do xurado e á entrega oficial dos trofeos desta segunda edición. Desde o Concello de Arteixo convídase a toda a veciñanza a apoiar o teatro amador nestas dúas xornadas de acceso libre e gratuíto ata completar a capacidade total do auditorio municipal.