O Ministerio de Ciencia e Innovación concedeu ao Concello de Arteixo unha subvención de 1,8 millóns de euros procedentes de fondos europeos FEDER para o desenvolvemento de proxectos baseados na intelixencia artificial. Esta contía supón o 60% dun orzamento total de tres millóns de euros destinados a modernizar a mobilidade, axilizar a administración e potenciar o turismo local. O goberno municipal traballa xa con outras administracións para completar o financiamento restante de 1,2 millóns de euros.
A iniciativa, denominada proxecto Arteixía, xorde do traballo previo do Concello dentro da Red Innpulso. O obxectivo principal é a creación dunha plataforma de intelixencia artificial municipal que actúe como un ecosistema centralizado para procesar e analizar datos que melloren a xestión da mobilidade en tempo real. O sistema permitirá optimizar as liñas de transporte, o servizo público de bicicletas e o uso das vías de comunicación mediante algoritmos preditivos. Así mesmo, Arteixía incluirá unha vertente dedicada á optimización dos servizos administrativos e á atención ao cidadán.
O alcalde Carlos Calvelo, salientou a importancia de seguir avanzando en ferramentas innovadoras que redunden nunha mellora directa dos servizos públicos para toda a veciñanza.