O Concello abre o prazo de presentación de obras para o 35º Certame de Narracións Breves “Manuel Murguía”, tras a publicación da convocatoria no Boletín Oficial da Provincia o pasado 9 de decembro. O concurso, un dos máis consolidados do panorama literario galego, busca promover a creación en galego e render homenaxe a Manuel Murguía.
O certame está dirixido a persoas maiores de 16 anos, que poderán presentar unha única narración orixinal, inédita e non premiada noutros concursos. As obras deberán estar escritas en galego e ter unha extensión de entre 30.000 e 70.000 caracteres con espazos. Como novidade nesta edición, a entrega realizarase preferentemente a través da sede electrónica do Concello de Arteixo, co obxectivo de facilitar o proceso administrativo.
O prazo permanecerá aberto ata o 31 de xaneiro de 2026.
A convocatoria establece tres premios: 4.000 euros para o primeiro, 2.000 para o segundo e 1.000 para o terceiro.
O acto oficial de entrega terá lugar o 8 de maio de 2026, con asistencia das tres persoas finalistas, seleccionadas por un xurado composto por especialistas de ampla traxectoria no ámbito literario.