Arteixo recibirá mañá, 5 de maio, o paso da terceira etapa da Volta Ciclista Feminina, competición que discorre entre as localidades de Padrón e A Coruña. Esta proba deportiva percorre actualmente o norte de España, con paradas programadas nas comunidades de Galicia, Castela e León e Asturias.
Segundo as previsións oficiais, o pelotón atravesará o termo municipal entre as 16:15 e as 17:15 horas aproximadamente. O itinerario afectará ás zonas de Chamín, Barrañán, o núcleo urbano de Arteixo, Oseiro, Pastoriza e Meicende.
Para garantir o correcto desenvolvemento da proba e a integridade das participantes, a Policía Local, Protección Civil e a Garda Civil de Tráfico coordinarán un dispositivo especial de seguridade. Esta operativa implicará cortes intermitentes na circulación, cunha duración estimada de entre dez e quince minutos en cada tramo a medida que avancen as ciclistas.
O Goberno local solicita a colaboración da cidadanía e recomenda extremar as medidas de seguridade persoal nas proximidades do percorrido durante o paso das deportistas.