Arteixo acollerá os días 25, 26 e 27 de setembro o Trial das Nacións, unha competición internacional de motociclismo por equipos nacionais organizada pola Federación Internacional de Motociclismo e o Club Motomontañismo Arteixo. A proba reunirá os mellores pilotos de diferentes países, que competirán representando as súas respectivas nacións.
A organización prevé a participación de 25 equipos nacionais procedentes de todo o mundo, con arredor de 150 deportistas. Entre pilotos, mecánicos, membros dos equipos, xuíces e voluntariado, o dispositivo estará composto aproximadamente por 500 persoas. A asistencia prevista supera os 2.500 espectadores.
A celebración do evento implicará diferentes afectacións ao tráfico e ao estacionamento debido ás necesidades de montaxe e organización da competición.
O aparcadoiro do campo de fútbol permanecerá pechado desde as 00.00 horas do xoves 24 de setembro ata as 22.00 horas do domingo 27. Na avenida Arsenio Iglesias estará prohibido estacionar no tramo comprendido entre o acceso á piscina municipal e o aparcadoiro do Centro Arteixo Innovación desde as 22.00 horas do xoves 24 ata as 22.00 horas do domingo 27.
No entorno do Campo da Festa estará prohibido estacionar desde as 16.00 horas do venres 25 ata as 22.00 horas do domingo 27.
Tamén desde as 16.00 horas do venres 25 producirase un corte de tráfico na avenida Arsenio Iglesias, desde a rotonda ata a entrada do aparcadoiro de Gadis, que se manterá ata o domingo 27 de setembro.
O Concello de Arteixo solicita á veciñanza que teña en conta estas medidas e planifique os seus desprazamentos durante os días de celebración do Trial das Nacións.