O concello de Arteixo iniciou hoxe a construción do novo parque comarcal de bombeiros, unha iniciativa que se atopa dentro de acordo ao que se chegou co Consorcio Provincial de bombeiros a través dun convenio que recolle o traslado do parque de bombeiros comarcal a unhas novas instalacións no polígono de Morás desde a súa localización actual no polígono de Sabón.
O actual parque de bombeiros está situado dentro dunha parcela municipal que alberga outros servizos como o departamento de recollida de residuos, obras ou protección civil.
O concello de Arteixo segregou 4.000 m² dunha parcela de propiedade municipal no polígono de Morás que posibilitou a construción dun novo parque de bombeiros comarcal que servirá para modernizar e ampliar as actuais instalacións.
O citado proxecto foi examinado polos técnicos do Consorcio de Bombeiros que deron o seu beneplácito, e supuxo un investimento de 1,3 millóns de euros.
O concello de Arteixo continúa así cos trámites necesarios para trasladar as instalacións que alberga a parcela de obras municipal, que alberga tamén o parque de bombeiros, e que ten nos seus terreos a maquinaria e as oficinas de obras, a maquinaria do sistema municipal de recollida de residuos (camións e outros vehículos auxiliares), a maquinaria do sistema público de limpeza municipal, o depósito de coches do guindastre municipal, e as instalacións de Protección Civil de Arteixo.
O aumento dos servizos municipais de Arteixo (sistema público de recollida de residuos e de limpeza viaria, principalmente) deixaron obsoletas unhas instalacións que carecen de naves suficientes para gardar todos os vehículos que teñen alí o seu central de operacións. O propio parque de bombeiros hai anos que quedou tamén obsoleto en canto a accesibilidade, e outro tipo de carencias estruturais.
Debido a esta situación e co obxecto de financiar a construción de novas instalacións para todos estes servizos públicos, o concello de Arteixo poxou en concurso público entre os anos 2022 e 2023 a citada parcela, que foi adquirida por Inditex por 5.082.000 euros, diñeiro que servirá para mellorar todas as instalacións públicas arriba citadas, incluíndo tamén o novo parque de Bombeiros, que ademais estará nunha parcela (polígono de Morás), que permitirá gañar tempo de reacción aos bombeiros #ante posibles emerxencias debido aos seus mellores accesos á autovía A-6.
