O concello de Arteixo aprobou esta semana en xunta de goberno o procedemento para expropiar tres casas situadas na travesía de Meirás en Meicende.
O concello abonará 151.000 euros polos tres inmobles, e os propietarios serán convocados no mes de abril no concello para executar a compra.
O proceso permitirá ampliar a travesía de Meirás nun ámbito da actuación que se sitúa entre os números 59 e 63 nunhas parcelas construídas, actualmente en situación fóra de ordenación por ocupar chan destinado a vial público conforme o plan urbanístico do Concello, na contorna do recinto escolar, a igrexa e o parque público lindeiro.
O proxecto de obra que se licitará e executará agora que se finalizou o proceso de expropiación, supoñerá un investimento de 233.000 euros, e ten por obxecto unha nova urbanización na Travesía de Meirás para obter e urbanizar o ancho efectivo do vial tras a expropiación e demolición das construcións fóra de ordenación.
Tras as demolicións para realizar das tres casas se explanará o terreo e se rasanteará á cota do vial para a formalización dunha beirarrúa peonil e unha serie de prazas de aparcamento en batería. A zona de aparcamento separarase de itinerario peonil mediante unha franxa de 2 metros de zona verde.
Mantéñense os accesos ás parcelas lindeiras da urbanización coas mesmas condicións. As obras tamén proxectan o desprazamento dun poste incompatible coa urbanización para o tensado de liñas existentes e o soterramento de liñas eléctricas novas no ámbito que dean servizo ás parcelas lindeiras coa nova urbanización.
