Todos os partidos da Corporación Municipal de Arteixo (PP, PSOE, BNG e Antonio Patiño, concelleiro non adscrito) acordaron decretar tres días de loito oficial no concello pola morte de Arsenio Iglesias Pardo.
O loito oficial comezará hoxe venres e estenderase ata o domingo.
Arsenio Iglesias Pardo, futbolista e adestrador nado no municipio foi unha das personalidades máis destacadas do mundo do deporte na historia de Galicia.
Arsenio Iglesias fora recoñecido polo concello como Fillo Predilecto de Arteixo e dedicáballe unha das principais rúas do concello (a avenida Arsenio Iglesias) como maneira de recoñecer a traxectoria deportiva que primeiro como xogador e despois como adestrador de fútbol desenvolveu Arsenio en diversos clubs españois e especialmente no Deportivo da Coruña.
O concello renderá homenaxe ao falecido Arsenio tanto nas exequias que se preparan na cidade da Coruña como no enterro que se celebrará en Arteixo.
