O Sindicato Unificado de Policía mantivo no día de hoxe unha reunión co alcalde de Arteixo, Carlos Calvelo e co concelleiro de seguridade cidadá, José María Sánchez. Por parte do SUP asistiron Roberto González, secretario xeral de Galicia, Abel Lobato, secretario provincial da Coruña, Mónica Tomei, secretaria de organización na provincia e Jesús Vasconcellos, secretario de relacións institucionais do Sindicato en Galicia.
O obxectivo do encontro era estudar e impulsar as medidas conxuntas para lograr que Arteixo conte, nun futuro próximo, cunha Comisaría propia da Policía Nacional.
O alcalde Carlos Calvelo iniciará as xestións, ante o Ministerio do Interior, para solicitar que se teña en conta esta petición na futura reforma do catálogo de postos de traballo que leve a cabo a Dirección Xeral da Policía, á vez que o SUP levará a cabo as peticións en leste mesmo sentido, tanto nos órganos da Xefatura Superior de Policia de Galicia, como o Consello de Policía, para que este servizo sexa unha realidade o máis axiña posible.
Tanto os responsables municipais como os representantes sindicais están de acordo en que Arteixo debe dispoñer dunha Comisaría de Policía Nacional na localidade que achegue, ademais dun plus en materia de Seguridade Cidadá, unha proximidade nas xestións entre a Administración e os seus administrados e na que os veciños e veciñas de toda a zona poidan realizar os trámites para os que, a día de hoxe, deben desprazarse a outras Comisarías próximas que contan con Unidades de Documentación, evitando a sobrecarga e o atraso nas citas previas nalgunhas desas dependencias que chegan a 5 semanas.
O SUP estima que a comisaría debe de contar con 105 postos de traballo efectivos para a dotar dos recursos necesarios para previr e investigar a delincuencia, coa recepción de todas as denuncias relacionadas coa Seguridade Cidadá, incrementando a coordinación e eficiencia na investigación dos delitos conexos entre A Coruña e Arteixo.
Tamén estaría dotada, ademais, cunha Unidade de Documentación con competencias en materia de expedición de documentación de españois (DNIe e pasaportes), de Tarxetas de Identidade de Estranxeiros, habilitando tamén a xeración ou actualización dos certificados que son requiridos nas relacións dixitais coa Administración, cada día, máis habituais. No caso de Galicia existen 19 unidades, sendo a última delas, a inaugurada hai dúas semanas no Barco de Valdeorras, na que o SUP xogou un papel importante no seu impulso inicial. No caso de Arteixo, conta cunha poboación de 33.000 habitantes e unha proxección a medio prazo de 50.000.