Arteixo sumarase á futura Área de Prestación Conxunta (APC) do servizo de taxi promovida pola Xunta de Galicia, tras acadar un acordo co sector durante unha reunión mantida entre o alcalde Carlos Calvelo, o tenente de alcalde José María Sánchez Novo, persoal municipal e representantes da asociación de taxistas e profesionais autónomos do municipio.
A maioría dos profesionais participantes no encontro mostraron o seu apoio á incorporación de Arteixo a este novo modelo de prestación do servizo, que ten como obxectivo mellorar a mobilidade e reforzar a cobertura do taxi no conxunto da comarca.
A creación desta Área de Prestación Conxunta permitirá que os taxis dos municipios adheridos poidan operar sen limitacións territoriais dentro do ámbito común establecido. Ademais, prevese a implantación dun sistema de licenzas compartidas, tarifas unificadas, paradas comúns e quendas coordinadas, co obxectivo de garantir unha mellor dispoñibilidade do servizo para a cidadanía.
A iniciativa foi presentada recentemente pola Xunta de Galicia aos concellos da Coruña, Arteixo, Cambre, Culleredo e Oleiros. Tras analizar a proposta e coñecer a opinión do sector local, o Concello de Arteixo trasladará a súa adhesión á administración autonómica, que será a encargada de continuar coa tramitación e regulación do novo sistema.
Como consecuencia deste novo escenario, o Concello paralizará a aprobación definitiva da nova ordenanza municipal do taxi que estaba en preparación, xa que será a Xunta a administración responsable de regular o servizo nos municipios integrados na Área de Prestación Conxunta.
O obxectivo final desta medida é incrementar a eficiencia do servizo, mellorar a atención ás persoas usuarias e garantir unha cobertura máis ampla e coordinada do taxi en toda a área metropolitana da Coruña.
