A Concellería de cultura continúa coa súa programación cultural «InvernArte» este venres, 30 de xaneiro, coa posta en escena da obra «De algo hai que morrer». A representación, a cargo da recoñecida compañía Malasombra Teatro, terá lugar no Auditorio do Centro Cívico Cultural Manuel Murguía a partir das 20:30 horas.
A peza, dirixida a un público adulto e cunha duración aproximada de 65 minutos, ofrece unha ollada humorística e singular sobre un tema universal: a morte. A trama presenta a dous prestixiosos e peculiares científicos, o profesor Jeckill e o profesor Hyde, quen divulgan as súas investigacións sobre este fenómeno que afecta ao cen por cento da poboación mundial sen distinción de ningunha clase.
O texto é obra de José Prieto e conta coa dirección de Marcos Orsi. O elenco artístico está composto polos actores Jouse García e Xoque Carbajal, que garanten unha velada de risas e reflexión a partes iguais.
As entradas teñen un prezo de 3 euros para o público xeral e de 2,25 euros para as tarifas reducidas (estudantes, maiores de 65 anos e menores de 12). Os interesados poden adquirir os seus tickets de xeito anticipado neste enlace ou no propio despacho de billetes do Centro Cívico desde dúas horas antes do inicio da función.